ਬਲਜੀਤ ਪਾਲ ਸਿੰਘ
ਮੇਰੀਆਂ ਚੋਣਵੀਆਂ ਗ਼ਜ਼ਲਾਂ
Monday, March 18, 2024
ਗ਼ਜ਼ਲ
Sunday, March 10, 2024
ਗ਼ਜ਼ਲ
ਆਪਣੇ ਹੀ ਦਰਦ ਦੇ ਮੈਂ ਹਾਣ ਦਾ ਹਾਂ ।
ਮੈਂ ਤਾਂ ਖ਼ੁਦ ਨੂੰ ਬਹੁਤ ਥੋੜ੍ਹਾ ਜਾਣਦਾ ਹਾਂ ।
ਗੀਟਿਆਂ ਤੇ ਪੱਥਰਾਂ ਦੇ ਸ਼ਹਿਰ ਵਿੱਚੋਂ ,
ਖਾਕ ਐਵੇਂ ਮੋਤੀਆਂ ਲਈ ਛਾਣਦਾ ਹਾਂ।
ਜੋ ਖਰੀਦੀ ਬਾਰਿਸ਼ਾਂ ਤੋਂ ਬਚਣ ਨੂੰ ਸੀ,
ਓਹੀ ਛੱਤਰੀ ਧੁੱਪ ਵੇਲੇ ਤਾਣਦਾ ਹਾਂ।
ਮੈਂ ਜਨਮ ਤੋਂ ਹੀ ਬਹਾਰਾਂ ਦਾ ਹਾਂ ਆਸ਼ਕ,
ਸਖ਼ਤ ਔੜਾਂ ਪਤਝੜਾਂ ਵੀ ਮਾਣਦਾ ਹਾਂ ।
ਸਹਿਜੇ ਸਹਿਜੇ ਤੁਰ ਰਿਹਾ ਹਾਂ ਮੈਂ ਭਾਵੇਂ,
ਔਖੇ ਪੈਂਡੇ ਵੀ ਮੁਕਾਉਣੇ ਠਾਣਦਾ ਹਾਂ ।
(ਬਲਜੀਤ ਪਾਲ ਸਿੰਘ)
Monday, February 19, 2024
ਗ਼ਜ਼ਲ
ਜੇ ਮੈਂ ਭੈੜਾ ਬੰਦਾ ਹੁੰਦਾ।
ਲੁੱਟ-ਖੋਹ ਮੇਰਾ ਧੰਦਾ ਹੁੰਦਾ।
ਦਾਗ਼ੋ-ਦਾਗ਼ ਚਰਿੱਤਰ ਵਾਲਾ,
ਬੰਦਾ ਬਹੁਤ ਹੀ ਗੰਦਾ ਹੁੰਦਾ।
ਪੱਥਰ ਜਹੀ ਤਬੀਅਤ ਹੁੰਦੀ,
ਸ਼ਕਲੋਂ ਥੋੜਾ ਮੰਦਾ ਹੁੰਦਾ।
ਡੇਰਾ ਹੁੰਦਾ ਸੜਕ ਕਿਨਾਰੇ,
ਲੱਖ ਕਰੋੜਾਂ ਚੰਦਾ ਹੁੰਦਾ।
ਆਕੜ ਫਾਕੜ ਜੋ ਵੀ ਕਰਦਾ,
ਉਹਦੇ ਗਲ ਵਿੱਚ ਫੰਦਾ ਹੁੰਦਾ।
(ਬਲਜੀਤ ਪਾਲ ਸਿੰਘ)
Saturday, February 10, 2024
ਗ਼ਜ਼ਲ
ਕੌਣ ਇਹ ਜਾਣੇ ਸਰਕਾਰਾਂ ਨੇ ਕੀ ਕਰਨਾ ਹੈ ?
ਏਸੇ ਕਰਕੇ ਹਾਲਾਤਾਂ ਤੋਂ ਵੀ ਡਰਨਾ ਹੈ ?
ਆਪੋ ਧਾਪੀ ਪਈ ਤਾਂ ਕਿਹੜੇ ਨਾਲ ਖੜ੍ਹਨਗੇ,
ਰੱਬ ਹੀ ਜਾਣੇ ਓਦੋਂ ਕਿਸ ਨੇ ਦਮ ਭਰਨਾ ਹੈ ?
ਐਵੇਂ ਕਿਹੜੇ ਵਹਿਮਾਂ ਵਿੱਚ ਫਿਰਦੇ ਹੋ ਜਾਨੂੰ,
ਵਕਤ ਹੀ ਦੱਸੇਗਾ ਕਿਸ ਡੁੱਬਣਾ ਕਿਸ ਤਰਨਾ ਹੈ ?
ਆਪਣੀ ਹਾਊਮੇ ਨੂੰ ਪੱਠੇ ਜਿੰਨੇ ਵੀ ਪਾਓ,
ਕੋਈ ਨਾ ਜਾਣੇ ਕਿਹੜੀ ਰੁੱਤੇ ਕਦ ਮਰਨਾ ਹੈ ?
ਭਾਵੇਂ ਲੀਨ ਸਮੁੰਦਰ ਵਿੱਚ ਹੋ ਜਾਂਦਾ ਹੈ ਇਹ,
ਦਰਿਆ ਨੂੰ ਪੈਦਾ ਕਰਦਾ ਆਖਰ ਝਰਨਾ ਹੈ ?
(ਬਲਜੀ
ਤ ਪਾਲ ਸਿੰਘ)
Saturday, February 3, 2024
ਗ਼ਜ਼ਲ
ਰੁੱਤ ਕਰੁੱਤ ਦੀ ਆਖਰੀ ਗ਼ਜ਼ਲ
ਮੇਰੇ ਦਿਲ ਵਿੱਚ ਬਹੁਤਾ ਡੂੰਘਾ ਲਹਿ ਗਿਆ ਹੈ ।
ਗਮ ਇਹਦੇ ਵਿੱਚ ਘਰ ਬਣਾ ਕੇ ਬਹਿ ਗਿਆ ਹੈ।
ਰਸਤੇ ਵਿੱਚ ਕੋਈ ਵੀ ਹਰਿਆਲੀ ਮਿਲੀ ਨਾ ,
ਇਹ ਸਫ਼ਰ ਬੇਕਾਰ ਹੋ ਕੇ ਰਹਿ ਗਿਆ ਹੈ।
ਪਲਕਾਂ ਉੱਤੇ ਅਟਕਿਆ ਜੋ ਅੱਥਰੂ ਮੁੱਦਤ ਤੋਂ ਸੀ,
ਆਈ ਉਸਦੀ ਯਾਦ ਤਾਂ ਉਹ ਵਹਿ ਗਿਆ ਹੈ ।
ਰੁੱਤਾਂ ਨੇ ਹਨ ਢਾਹੀਆਂ ਏਨੀਆਂ ਬੇਰੁਖੀਆਂ,
ਕੱਚਾ ਘਰ ਸੀ ਬਾਰਿਸ਼ ਦੇ ਵਿੱਚ ਢਹਿ ਗਿਆ ਹੈ।
ਲੱਗਿਆ ਏਦਾਂ ਸੀ ਹੁਣ ਕੀ ਕਰਾਂਗੇ ਉਹਦੇ ਬਿਨ,
ਫਿਰ ਵੀ ਲੰਮੀ ਦਿਲ ਜੁਦਾਈ ਸਹਿ ਗਿਆ ਹੈ ।
ਏਥੇ ਲੱਖਾਂ ਧਰਤੀਆਂ ਆਕਾਸ਼ ਵੀ ਲੱਖਾਂ ਹੀ ਨੇ,
ਸਾਡਾ ਬਾਬਾ ਸਦੀਆਂ ਪਹਿਲਾਂ ਕਹਿ ਗਿਆ ਹੈ।
(ਬਲਜੀਤ ਪਾਲ ਸਿੰਘ)
Sunday, January 21, 2024
ਗ਼ਜ਼ਲ
ਰੱਬ ਸੁਰਖੁਰੂ ਹੋਇਆ ਉਸਨੇ ਧਰਤੀ ਉੱਤੇ ਮਾਵਾਂ ਘੱਲੀਆਂ
ਮਮਤਾ ਮੂਰਤ ਸਾਬਤ ਘੜ ਕੇ ਠੰਢੀਆਂ ਮਿੱਠੀਆਂ ਛਾਵਾਂ ਘੱਲੀਆਂ
ਆਏ ਰੰਗ ਬਰੰਗੇ ਬੰਦੇ ਕਰਦੇ ਆਪੋ ਆਪਣੇ ਧੰਦੇ
ਸ਼ੀਤਲ ਹਿਰਦੇ ਕਲਮਾਂ ਵਾਲੇ ਗ਼ਜ਼ਲਾਂ ਤੇ ਕਵਿਤਾਵਾਂ ਘੱਲੀਆਂ
ਜਿਹੜੇ ਭਾਅ ਵੀ ਮਿਲੇ ਮੁਹੱਬਤ ਉਹ ਨਹੀਂ ਘਾਟੇਵੰਦਾ ਸੌਦਾ
ਸੱਜਣ ਬੇਲੀ ਮਿਲਦੇ ਜੁਲਦੇ ਹਰੀਆਂ ਭਰੀਆਂ ਰਾਹਵਾਂ ਘੱਲੀਆਂ
ਰਿਸ਼ਤੇ ਨਾਤੇ ਤੰਦਾਂ ਆਈਆਂ ਰੀਤਾਂ ਰਸਮਾਂ ਡੋਰੇ ਪਾਏ
ਤਾਏ ਚਾਚੇ ਭੂਆ ਭੈਣਾਂ ਭਾਈ ਘੱਲੇ ਬਾਹਵਾਂ ਘੱਲੀਆਂ
ਝੱਖੜ 'ਨ੍ਹੇਰੀ ਪਤਝੜ ਆਈ ਮਿੱਠੀਆਂ ਮਿੱਠੀਆਂ ਪੈਣ ਫੁਹਾਰਾਂ
ਗਰਮੀ ਸਰਦੀ ਦੀ ਰੁੱਤ ਆਈ ਨਾਲੇ ਸਾਉਣ ਘਟਾਵਾਂ ਘੱਲੀਆਂ
ਰੀਝਾਂ ਸੁਫ਼ਨੇ ਖ਼ਾਮ ਖ਼ਿਆਲੀ ਚਰਚਾ ਕਰਦੀ ਖ਼ਲਕਤ ਸਾਰੀ
ਸੋਨੇ ਚਾਂਦੀ ਰੰਗੇ ਪੰਨੇ ਕਰਕੇ ਪਰੀ ਕਥਾਵਾਂ ਘੱਲੀਆਂ
ਤਪਦੀ ਉਮਰੇ ਔਖਾ ਹੋਵੇਗਾ ਇਹ ਨਾਜ਼ੁਕ ਦਿਲ ਦਾ ਮਾਲਕ
ਤਾਹੀਂ ਤਾਂ ਬਲਜੀਤ ਲਈ ਉਸ ਕੂਲੀਆਂ ਕੂਲੀਆਂ 'ਵਾਵਾਂ ਘੱਲੀਆਂ
(ਬਲਜੀਤ ਪਾਲ ਸਿੰਘ)
Tuesday, January 9, 2024
ਗ਼ਜ਼ਲ
ਸਾਰਾ ਦਿਨ ਮੈਂ ਕਿਵੇਂ ਲੰਘਾਵਾਂ, ਕੋਈ ਨਾ ਜਾਣੇ
ਏਧਰ ਓਧਰ ਵਕਤ ਟਪਾਵਾਂ, ਕੋਈ ਨਾ ਜਾਣੇ
ਗੱਲੀਂ ਬਾਤੀਂ ਮੇਰੇ ਜੋ ਹਮਦਰਦ ਬਣੇ ਹਨ
ਓਹਨਾ ਦੇ ਵੀ ਰਾਜ਼ ਸੁਣਾਵਾਂ, ਕੋਈ ਨਾ ਜਾਣੇ
ਫੁੱਲਾਂ ਨੇ ਖਿੜ੍ਹਨਾ, ਪੱਕਣਾ,ਕਿਰ ਜਾਣਾ ਹੁੰਦਾ
ਰੁੱਤਾਂ ਦੇ ਉਹ ਦਰਦ ਗਿਣਾਵਾਂ, ਕੋਈ ਨਾ ਜਾਣੇ
ਆਸੇ ਪਾਸੇ ਵੀ ਮਹਿਬੂਬ ਜਹੇ ਬੰਦੇ ਹੁੰਦੇ ਨੇ
ਆਓ ਜਾਣ ਪਛਾਣ ਕਰਾਵਾਂ, ਕੋਈ ਨਾ ਜਾਣੇ
ਮੁੱਠੀ ਵਿੱਚੋਂ ਕਿਰ ਜਾਂਦੀ ਉਹ ਰੇਤਾ ਵਾਂਗੂੰ
ਜਦ ਵੀ ਕੋਈ ਬਣਤ ਬਣਾਵਾਂ, ਕੋਈ ਨਾ ਜਾਣੇ
ਸੁਰਗ ਨਰਕ ਹੁੰਦਾ ਹੈ ਜਾਂ ਫਿਰ ਇੱਕ ਛਲਾਵਾ
ਸਭ ਨੂੰ ਐਵੇਂ ਰੋਜ ਡਰਾਵਾਂ, ਕੋਈ ਨਾ ਜਾਣੇ
ਜੰਗਲ ਦੇ ਵਿੱਚ ਬਿਰਖ ਇਕੱਲਾ ਵੀ ਨਾ ਹੋਵੇ
ਚੜ੍ਹਤਾਂ ਹੁੰਦੀਆਂ ਨਾਲ ਭਰਾਵਾਂ, ਕੋਈ ਨਾ ਜਾਣੇ
(ਬਲਜੀਤ ਪਾਲ ਸਿੰਘ)
Saturday, December 30, 2023
ਗ਼ਜ਼ਲ
ਪੌਣ ਸੁਨਹਿਰੀ ਧਰਤ ਰੰਗੀਲੀ ਤੇ ਸ਼ੀਤਲ ਜਲ ਖ਼ਤਰੇ ਵਿੱਚ ਹੈ
ਝਰਨੇ ਪਰਬਤ ਜੀਵ ਜਨੌਰੇ ਤੇ ਹਰਿਆਵਲ ਖ਼ਤਰੇ ਵਿੱਚ ਹੈ
ਧੁੰਦਲੇ ਮੌਸਮ ਗੰਧਲੇ ਰਸਤੇ ਕਾਲੀਆਂ ਰਾਤਾਂ ਵਰਗਾ ਜੀਵਨ
ਪਹਿਲਾਂ ਵਾਲਾ ਸਮਾਂ ਤੇ ਕਾਰ ਵਿਹਾਰ ਉਹ ਨਿਰਛਲ ਖ਼ਤਰੇ ਵਿੱਚ ਹੈ
ਸੜਕਾਂ ਉੱਤੇ ਦੁਰਘਟਨਾਵਾਂ ਖੂਨ ਖ਼ਰਾਬਾ ਪਹੁੰਚ ਗਿਆ ਹੈ ਸਿਖਰਾਂ ਤੀਕਰ
ਹਰ ਬੰਦੇ ਦੀ ਜਿੰਦਗੀ ਦਾ ਹਰ ਇੱਕ ਲੰਘਦਾ ਪਲ ਖ਼ਤਰੇ ਵਿੱਚ ਹੈ
ਸਿੰਥੈਟਿਕ ਵਸਤਾਂ ਵਿੱਚ ਹੋਈ ਇਹ ਪੀੜ੍ਹੀ ਗਲਤਾਨ ਇਸ ਤਰ੍ਹਾਂ
ਭਗਤ ਕਬੀਰ ਦਾ ਖੱਦਰ ਤੇ ਢਾਕੇ ਦੀ ਮਲਮਲ ਖ਼ਤਰੇ ਵਿੱਚ ਹੈ
ਦਰਦ ਅਵੱਲੜੇ ਸੜ ਜਾਣੇ ਹਨ ਸਿਵਿਆਂ ਅੰਦਰ ਸਭ ਦੇ ਸਾਹਵੇਂ
ਸਾਹਾਂ ਵਾਲੀ ਡੋਰ 'ਚ ਪੈਦਾ ਹੁੰਦੀ ਹੈ ਜੋ ਹਲਚਲ ਖ਼ਤਰੇ ਵਿੱਚ ਹੈ
ਪਾਗਲ ਹੋਈ ਭੱਜੀ ਫਿਰਦੀ ਏਦਾਂ ਖ਼ਲਕਤ ਗਲੀਆਂ ਅਤੇ ਬਾਜ਼ਾਰਾਂ ਅੰਦਰ
ਸਾਦ ਮੁਰਾਦੇ ਕੱਚੇ ਰਾਹ ਤੇ ਪਗਡੰਡੀ ਨਿਰਮਲ ਖ਼ਤਰੇ ਵਿੱਚ ਹੈ
ਵਰਤ ਵਰਤ ਕੇ ਸਾਧਨ ਸਾਰੇ ਕਿੰਨਾ ਕੁਝ ਹੀ ਆਪ ਮੁਕਾਇਆ
ਪਾਣੀ ਇੱਕ ਦਿਨ ਮੁੱਕ ਜਾਣਗੇ ਤਾਹੀਂ ਜਲਥਲ ਖ਼ਤਰੇ ਵਿੱਚ ਹੈ
(ਬਲਜੀਤ ਪਾਲ ਸਿੰਘ)
Tuesday, December 26, 2023
ਗ਼ਜ਼ਲ
ਛੱਡ ਕੇ ਜ਼ਿੰਮੇਵਾਰੀ ਕਿੱਥੇ ਜਾਓਗੇ ?
ਅੱਗੇ ਦੁਨੀਆਦਾਰੀ ਕਿੱਥੇ ਜਾਓਗੇ ?
ਐਨੀ ਛੇਤੀ ਬੰਦ-ਖਲਾਸੀ ਨਹੀਂ ਹੋਣੀ,
ਦਫ਼ਤਰ ਇਹ ਸਰਕਾਰੀ ਕਿੱਥੇ ਜਾਓਗੇ ?
ਵੀਜ਼ਾ ਲੈ ਕੇ ਯੂਰਪ ਭੱਜਣ ਲੱਗੇ ਹੋ,
ਐਥੇ ਹੀ ਸਰਦਾਰੀ ਕਿੱਥੇ ਜਾਓਗੇ ?
ਡੇਰੇ ਡੂਰੇ ਛੱਡ ਕੇ ਆਪਣੇ ਘਰ ਬੈਠੋ,
ਲੈ ਕੇ ਲੰਬੜਦਾਰੀ ਕਿੱਥੇ ਜਾਓਗੇ ?
ਕਦੇ ਕਦਾਈਂ ਸੱਚ ਨੂੰ ਫਾਂਸੀ ਹੋ ਜਾਂਦੀ,
ਬਣ ਕੇ ਪਰਉਪਕਾਰੀ ਕਿੱਥੇ ਜਾਓਗੇ ?
(ਬਲਜੀਤ ਪਾਲ ਸਿੰਘ)
Thursday, December 21, 2023
ਗ਼ਜ਼ਲ
ਸੱਟਾਂ ਫੇਟਾਂ ਰਗੜਾਂ ਜ਼ਖ਼ਮ ਬਥੇਰੇ ਨੇ
ਬਹੁਤੇ ਸਾਰੇ ਆਪ ਸਹੇੜੇ ਮੇਰੇ ਨੇ
ਧਰਤੀ ਮਾਤਾ ਪਾਣੀ-ਪੌਣ ਅਤੇ ਬੈਸੰਤਰ
ਸਭ ਦੇ ਸਾਂਝੇ ਨਾ ਇਹ ਮੇਰੇ ਤੇਰੇ ਨੇ
ਹਾਜ਼ਰ ਨਾਜ਼ਰ ਵੇਖੋ ਕੁਦਰਤ ਕਾਦਰ ਦੀ
ਸਾਡੇ ਸਾਹਵੇਂ ਕਿੰਨੇ ਰੰਗ ਬਖੇਰੇ ਨੇ
ਕਾਲੇ ਸ਼ੀਸ਼ੇ ਪਰਦੇ ਓਹਲੇ ਸਾਜ਼ਿਸ਼ ਹੈ
ਬਾਹਰ ਸੋਹਣਾ ਚਾਨਣ ਧੁੱਪ ਬਨੇਰੇ ਨੇ
ਡਟਿਆ ਰਹੀਂ ਕਿਸਾਨਾ ਆਪਣੇ ਖੇਤਾਂ ਵਿਚ
ਸਭਨਾਂ ਨਾਲੋਂ ਤੇਰੇ ਕੰਮ ਵਡੇਰੇ ਨੇ
ਜਿਹਨਾਂ ਲੋਕਾਂ ਰੱਜ ਕੇ ਮਿਹਨਤ ਕੀਤੀ ਹੈ
ਉਹਨਾਂ ਦੇ ਹੀ ਰੌਸ਼ਨ ਹੋਏ ਸਵੇਰੇ ਨੇ
(ਬਲਜੀਤ ਪਾਲ ਸਿੰਘ)
Monday, December 18, 2023
ਗ਼ਜ਼ਲ
ਹੱਡੀਂ ਬੀਤੇ ਕਿੰਨੇ ਹੀ ਅਫ਼ਸਾਨੇ ਲੈ ਕੇ ਮਰ ਜਾਂਦੇ ਨੇ
ਲੋਕੀਂ ਮਨ ਤੇ ਬੋਝ ਕਿਵੇਂ ਐਨਾ ਬਰਦਾਸ਼ਤ ਕਰ ਜਾਂਦੇ ਨੇ
ਉਹਨਾਂ ਦਾ ਕੀ ਜੀਣਾ ਜਿਹੜੇ ਘਬਰਾ ਜਾਣ ਹਾਲਾਤਾਂ ਕੋਲੋਂ
ਗਰਮੀ ਸਰਦੀ ਮੌਸਮ ਕਰਕੇ ਬਾਹਰ ਜਾਣ ਤੋਂ ਡਰ ਜਾਂਦੇ ਨੇ
ਸੜਕਾਂ ਉੱਤੇ ਦੋਹੀਂ ਪਾਸੀਂ ਲੱਗਿਆ ਰਹਿੰਦਾ ਜਾਮ ਸਦਾ ਹੀ
ਲੋੜ ਮੁਤਾਬਿਕ ਵਸਤਾਂ ਲੈ ਕੇ ਗਾਹਕ ਆਪਣੇ ਘਰ ਜਾਂਦੇ ਨੇ
ਛੱਡ ਕੇ ਖੁਦਗਰਜ਼ੀ ਨੂੰ ਥੋੜੇ ਨੇਕ ਜਿਹੇ ਬੰਦੇ ਏਥੇ ਵੀ
ਮੋਹ ਮੁਹੱਬਤ ਦੇ ਦੀਵੇ ਦਿਲ ਦੀ ਮਮਟੀ ਤੇ ਧਰ ਜਾਂਦੇ ਨੇ
ਜਦੋਂ ਕਦੇ ਵੀ ਲੋੜ ਪਈ ਤਾਂ ਓਦੋਂ ਰੂਹ ਵਾਲੇ ਕੁਝ ਮਿੱਤਰ
ਸਮੇਂ ਸਮੇਂ ਤੇ ਹੋਈਆਂ ਜੋ ਉਹ ਖਾਲੀ ਥਾਵਾਂ ਭਰ ਜਾਂਦੇ ਨੇ
(ਬਲਜੀਤ ਪਾਲ ਸਿੰਘ)
Friday, December 15, 2023
ਗ਼ਜ਼ਲ
ਕੱਚੇ ਵਿਹੜੇ ਤੇ ਘਰਾਂ ਨੂੰ ਯਾਦ ਰੱਖੀਂ
ਰੌਣਕਾਂ ਲੱਗਦੇ ਦਰਾਂ ਨੂੰ ਯਾਦ ਰੱਖੀਂ
ਤੇਰੀ ਮਰਜੀ ਹੈ ਕਰੀਂ ਪਰਵਾਸ ਭਾਵੇਂ
ਛੱਡੇ ਹੋਏ ਪਰ ਗਰਾਂ ਨੂੰ ਯਾਦ ਰੱਖੀਂ
ਹੇਰਵਾ ਹੋਇਆ ਜੇ ਮੁੱਕੇ ਪਾਣੀਆਂ ਦਾ
ਸੁੱਕੇ ਹੋਏ ਸਰਵਰਾਂ ਨੂੰ ਯਾਦ ਰੱਖੀਂ
ਪੁਰਖਿਆਂ ਆਬਾਦ ਕੀਤੇ ਜੋ ਕਦੇ
ਰੱਕੜਾਂ ਤੇ ਬੰਜਰਾਂ ਨੂੰ ਯਾਦ ਰੱਖੀਂ
ਚੀਰਿਆ ਪੰਜਾਬ ਉਹਨਾਂ ਜ਼ਾਲਮਾਂ ਦੇ
ਤਿੱਖੇ ਤੱਤੇ ਨਸ਼ਤਰਾਂ ਨੂੰ ਯਾਦ ਰੱਖੀਂ
ਗ਼ਰਜ਼ਾਂ ਲਈ ਗੱਦਾਰ ਜਿਹੜੇ ਹੋ ਗਏ
ਐਸੇ ਝੂਠੇ ਰਹਿਬਰਾਂ ਨੂੰ ਯਾਦ ਰੱਖੀਂ
(ਬਲਜੀਤ ਪਾਲ ਸਿੰਘ)
ੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱੱ
Saturday, December 9, 2023
ਗ਼ਜ਼ਲ
ਕੰਮ ਮੁਕੰਮਲ ਹੋਣ ਸੁਚੱਜੀਆਂ ਬਾਹਾਂ ਨਾਲ।
ਜੇਕਰ ਤੱਕੀਏ ਦੁਨੀਆ ਨੇਕ ਨਿਗਾਹਾਂ ਨਾਲ।
ਉਤੋਂ ਉਤੋਂ ਬਾਬਾ ਨਾਨਕ ਸਾਡਾ ਹੈ ,
ਅੰਦਰੋਂ ਅੰਦਰੀ ਸਾਡੀ ਯਾਰੀ ਸ਼ਾਹਾਂ ਨਾਲ।
ਆਖਰ ਇੱਕ ਦਿਨ ਬੇੜੀ ਉਸਦੀ ਡੁਬੇਗੀ,
ਜਿਸਦੀ ਬਹੁਤੀ ਬਣਦੀ ਨਹੀਂ ਮਲਾਹਾਂ ਨਾਲ।
ਮੰਜ਼ਿਲ ਮਿਲਣੀ ਓਦੋਂ ਸੌਖੀ ਹੋ ਜਾਂਦੀ,
ਬਣਿਆ ਰਹਿੰਦਾ ਜਦ ਤੱਕ ਨਾਤਾ ਰਾਹਾਂ ਨਾਲ।
ਹਾਰਨ ਦਾ ਡਰ ਪੂਰਾ ਨਿਸ਼ਚਿਤ ਹੋ ਜਾਂਦਾ,
ਲੜੀਏ ਜਦੋਂ ਮੁਕੱਦਮਾ ਕੂੜ ਗਵਾਹਾਂ ਨਾਲ।
ਬਰਕਤ ਉਸ ਕਾਰਜ ਵਿੱਚ ਪੈਂਦੀ ਜੋ ਕਰੀਏ ,
ਬੋਹੜਾਂ ਜਹੇ ਬਜ਼ੁਰਗਾਂ ਦੀਆਂ ਸਲਾਹਾਂ ਨਾਲ ।
(ਬਲਜੀਤ ਪਾਲ ਸਿੰਘ)
Sunday, December 3, 2023
ਗ਼ਜ਼ਲ
ਤੇਰੀਆਂ ਚਲਾਕੀਆਂ ਨੂੰ ਕੀ ਕਹਾਂ ?
ਤੂੰ ਹੈਂ ਮੇਰਾ ਬਾਕੀਆਂ ਨੂੰ ਕੀ ਕਹਾਂ ?
ਚੰਗਾ ਮਾੜਾ ਮੂੰਹ ਦੇ ਉੱਤੇ ਆਖ ਦਿਨੈਂ
ਐਸੀਆਂ ਬੇਬਾਕੀਆਂ ਨੂੰ ਕੀ ਕਹਾਂ ?
ਆਵੇਂ ਜਾਵੇਂ ਚੋਰੀ ਚੋਰੀ ਰੋਜ਼ ਹੀ ਤੂੰ
ਤੇਰੀਆਂ ਇਹ ਝਾਕੀਆਂ ਨੂੰ ਕੀ ਕਹਾਂ ?
ਕਾਹਤੋਂ ਛੱਡੇਂ ਤੀਰ ਸਿੱਧੇ ਅੰਬਰਾਂ ਨੂੰ
ਲਾ ਰਿਹੈਂ ਜੋ ਟਾਕੀਆਂ ਨੂੰ ਕੀ ਕਹਾਂ ?
ਬੰਦ ਹੋਏ ਬੂਹਿਆਂ ਦੀ ਸਮਝ ਵੀ ਹੈ
ਬੰਦ ਹੋਈਆਂ ਤਾਕੀਆਂ ਨੂੰ ਕੀ ਕਹਾਂ ?
ਤੱਕਦਾ ਹਾਂ ਸੁੰਨਿਆਂ ਮੈਖਾਨਿਆਂ ਨੂੰ
ਰੁੱਸ ਬੈਠੇ ਸਾਕੀਆਂ ਨੂੰ ਕੀ ਕਹਾਂ ?
ਲੰਘ ਚੁੱਕਾ ਦੌਰ ਹੁਣ ਤਾਂ ਚਿੱਠੀਆਂ ਦਾ
ਵਿਹਲੇ ਫਿਰਦੇ ਡਾਕੀਆਂ ਨੂੰ ਕੀ ਕਹਾਂ ?
(ਬਲਜੀਤ ਪਾਲ ਸਿੰਘ)
Wednesday, November 22, 2023
ਗ਼ਜ਼ਲ
ਲੰਘ ਗਏ ਨੇ ਸੱਜਣ ਏਥੋਂ ਰੁਕਦੇ ਰੁਕਦੇ
ਸਾਹ ਅਸਾਡੇ ਮਸਾਂ ਬਚੇ ਨੇ ਮੁਕਦੇ ਮੁਕਦੇ
ਕਈ ਮਾਰਦੇ ਨੇ ਲਲਕਾਰੇ ਗਲੀਆਂ ਅੰਦਰ
ਕਈ ਲੰਘਾਉਂਦੇ ਉਮਰਾਂ ਏਥੇ ਲੁਕਦੇ ਲੁਕਦੇ
ਰੀਝਾਂ ਚਾਵਾਂ ਸੱਧਰਾਂ ਨਾਲ ਹੰਢਾਇਆ ਹੋਇਆ
ਕਬਰਾਂ ਨੇੜੇ ਆਇਆ ਜੀਵਨ ਢੁਕਦੇ ਢੁਕਦੇ
ਸੋਹਣੇ ਪੌਦੇ ਗਮਲੇ ਵਿੱਚ ਲਗਾ ਲੈਂਦੇ ਹਾਂ
ਪਾਣੀ ਨਾ ਦਈਏ ਮਰ ਜਾਂਦੇ ਸੁਕਦੇ ਸੁਕਦੇ
ਧੌਲੇ ਆਏ ਤੇ ਅੱਖਾਂ ਦੀ ਚਮਕ ਗੁਆਚੀ
ਫ਼ਰਜ਼ਾਂ ਦੇ ਬੋਝਾਂ ਨੂੰ ਆਖਰ ਚੁਕਦੇ ਚੁਕਦੇ
ਤੁਰਦਾ ਤੁਰਦਾ ਉਹ ਵੀ ਸ਼ਾਇਦ ਥੱਕਿਆ ਹੋਣੈ
ਸੂਰਜ ਪੱਛਮ ਵੱਲ ਨੂੰ ਹੋਇਆ ਝੁਕਦੇ ਝੁਕਦੇ
(ਬਲਜੀਤ ਪਾਲ ਸਿੰਘ)
Tuesday, November 21, 2023
ਗ਼ਜ਼ਲ
ਜ਼ਿੰਦਗੀ ਦੇ ਬਹੁਤਾ ਕਰੀਬ ਕੋਈ ਨਹੀਂ ।
ਇਹਨੀਂ ਦਿਨੀਂ ਮੇਰਾ ਰਕੀਬ ਕੋਈ ਨਹੀਂ ।
ਹੁੰਦੇ ਸੁੰਦੇ ਸਭ ਕੁਝ ਏਦਾਂ ਲੱਗ ਰਿਹਾ ,
ਮੇਰੇ ਵਰਗਾ ਗ਼ਰੀਬ ਕੋਈ ਨਹੀਂ ।
ਮਾਪ ਸਕੇ ਦਿਲ ਦੇ ਡੂੰਘੇ ਦਰਦ ਨੂੰ ਜੋ ,
ਬਣੀ ਐਸੀ ਅਜੇ ਜਰੀਬ ਕੋਈ ਨਹੀਂ ।
ਲਿਖ ਦੇਵੇ ਜੋ ਮੇਰੇ ਨਾਮ ਨਜ਼ਮ ਤਾਜ਼ਾ ,
ਗਰਾਂ ਮੇਰੇ ਅੰਦਰ ਅਦੀਬ ਕੋਈ ਨਹੀਂ ।
ਮਰਜ਼ ਕੀ ਹੈ ਮੈਨੂੰ ਸਮਝ ਸਕੇ ਆਖਿਰ ,
ਲੱਭ ਰਿਹਾਂ, ਮਿਲਦਾ ਤਬੀਬ ਕੋਈ ਨਹੀਂ ।
(ਬਲਜੀਤ ਪਾਲ ਸਿੰਘ)
Wednesday, November 15, 2023
ਗ਼ਜ਼ਲ
ਚਾਤਰ ਵਾਂਗ ਡਰਾਇਆ ਨਾ ਕਰ
ਮਹਿਲ ਹਵਾਈ ਪਾਇਆ ਨਾ ਕਰ
ਦੋਸਤ ਹੈਂ ਤਾਂ ਦੋਸਤ ਹੀ ਰਹਿ
ਬਿਨ ਮਤਲਬ ਲਲਚਾਇਆ ਨਾ ਕਰ
ਮੌਜਾਂ ਲੁੱਟ ਤੇ ਕਰ ਲੈ ਐਸ਼ਾਂ
ਖਾਹਿਸ਼ ਕੋਈ ਦਬਾਇਆ ਨਾ ਕਰ
ਏਥੇ ਸੱਚ ਦੇ ਹੋਣ ਨਬੇੜੇ
ਘੋੜੇ ਤੇਜ਼ ਦੁੜਾਇਆ ਨਾ ਕਰ
ਗੇੜੇ ਦੇਵਣ ਧਰਤੀ ਸੂਰਜ
ਛੇਤੀ ਪੰਧ ਮੁਕਾਇਆ ਨਾ ਕਰ
ਤੈਨੂੰ ਡਾਢਾ ਇਲਮ ਹੈ ਭਾਵੇਂ
ਰੋਜ਼ ਬੁਝਾਰਤ ਪਾਇਆ ਨਾ ਕਰ
ਤੇਰੇ ਕੋਲੋਂ ਬੜੀਆਂ ਆਸਾਂ
ਗੱਲਾਂ ਵਿੱਚ ਉਲਝਾਇਆ ਨਾ ਕਰ
(ਬਲਜੀਤ ਪਾਲ ਸਿੰਘ)
Saturday, November 11, 2023
ਗ਼ਜ਼ਲ
ਪੱਥਰ ਉੱਤੇ ਸੋਹਣੀ ਲੱਗਦੀ ਮੀਨਾਕਾਰੀ ਵੇਖ ਲਈ ਹੈ
ਕੈਨਵਸ ਉੱਤੇ ਵਾਹੀ ਸੂਹੀ ਚਿੱਤਰਕਾਰੀ ਵੇਖ ਲਈ ਹੈ
ਮੇਰੇ ਪਿੰਡ ਦੀ ਫਿਰਨੀ ਉੱਤੇ ਸ਼ਾਮ ਨੂੰ ਰੌਣਕ ਵੇਖ ਲਵੀਂ
ਤੇਰੇ ਸ਼ਹਿਰ ਦੀ ਝੂਠੀ ਸਾਰੀ ਖਾਤਿਰਦਾਰੀ ਵੇਖ ਲਈ ਹੈ
ਦਾਅਵਾ ਕਰਦਾ ਰਹਿੰਦਾ ਸੀ ਕਿ ਤੂੰ ਹੈ ਯਾਰ ਗਰੀਬਾਂ ਦਾ
ਸੋਨੇ ਦੇ ਸਿੱਕੇ ਤੇਰੇ ਘਰ ਉਹ ਅਲਮਾਰੀ ਵੇਖ ਲਈ ਹੈ
ਪੰਛੀ ਆਏ ਚੁਰ ਚੁਰ ਲਾਈ ਤੇ ਝੁਰਮਟ ਹੈ ਪਾਇਆ
ਟਾਹਣੀ ਉੱਤੇ ਰੁੱਖਾਂ ਸੰਗ ਉਹਨਾਂ ਦੀ ਯਾਰੀ ਵੇਖ ਲਈ ਹੈ
ਆਪਣੇ ਹਮਸਾਇਆਂ ਨੂੰ ਖਾਧਾ ਨੋਚ ਨੋਚ ਕੇ ਜਿੰਨਾ ਨੇ
ਲੰਬੜਦਾਰਾਂ ਦੀ ਝੂਠੀ ਆਲੰਬਰਦਾਰੀ ਵੇਖ ਲਈ ਹੈ
ਮੈਂ ਦਰਗਾਹ ਦੇ ਦੀਵੇ ਵਾਂਗੂੰ ਜਗਦਾ ਬੁਝਦਾ ਰਹਿੰਦਾ ਹਾਂ
ਆਉਂਦੇ ਜਾਂਦੇ ਲੋਕਾਂ ਦੀ ਐਪਰ ਰੂਹਦਾਰੀ ਵੇਖ ਲਈ ਹੈ
ਚਾਹੇ ਸੀ ਕੁਝ ਰੰਗ ਬਰੰਗੇ ਫੁੱਲਾਂ ਦੇ ਦਰਸ਼ਨ ਦੀਦਾਰੇ
ਗੁਲਸ਼ਨ ਦੇ ਚਾਰੇ ਪਾਸੇ ਪਰ ਚਾਰਦੀਵਾਰੀ ਵੇਖ ਲਈ ਹੈ
ਸੱਤਾ ਮੂਹਰੇ ਨੱਚਦੀ ਹੋਈ ਲਾਲਾਂ ਸੁੱਟਦੀ ਰਹਿੰਦੀ ਏਦਾਂ
ਬਹੁਤੇ ਕਵੀਆਂ ਦੀ ਕਵਿਤਾ ਵੀ ਦਰਬਾਰੀ ਵੇਖ ਲਈ ਹੈ
(ਬਲਜੀਤ ਪਾਲ ਸਿੰਘ)
Sunday, November 5, 2023
ਗ਼ਜ਼ਲ
ਜ਼ਖਮਾਂ ਵਾਂਗੂੰ ਰਿਸਦੀ ਹੈ ਤੇ ਦਰਦ ਕਰੇਂਦੀ ਹੈ।
ਮੈਨੂੰ ਲੰਮੀ ਰਾਤ ਡਰਾਉਣੇ ਸੁਫ਼ਨੇ ਦੇਂਦੀ ਹੈ।
ਲੋਹੜਾ ਹੋਇਆ ਜੇਕਰ ਉਸ ਨੇ ਸੱਚ ਆਖਿਆ ਤਾਂ,
ਸਾਰੀ ਖ਼ਲਕਤ ਉਸਨੂੰ ਟੀਰੀ ਅੱਖ ਨਾਲ ਵੇਂਹਦੀ ਹੈ।
ਖੌਰੇ ਕਿਹੜੇ ਬਾਗਾਂ ਵਿੱਚੋਂ ਚੁਣ ਚੁਣ ਲੈ ਆਉੰਦੀ ,
ਕੁਦਰਤ ਇਹਨਾਂ ਫੁੱਲਾਂ ਵਿੱਚ ਜੋ ਰੰਗ ਭਰੇਂਦੀ ਹੈ।
ਲੋਕਾਂ ਦਾ ਕੀ ਇਹ ਤਾਂ ਉਸਨੂੰ ਪੱਥਰ ਕਹਿ ਦਿੰਦੇ ,
ਆਪਣੀ ਕੁੱਖੋਂ ਜਿਹੜੀ ਸੋਹਣੇ ਬਾਲ ਜਣੇਂਦੀ ਹੈ ।
ਰਾਜੇ ਹੇਠਾਂ ਕੁਰਸੀ ਏਸੇ ਕਰਕੇ ਹੈ ਉੱਚਾ ,
ਉਤਰੇਗਾ ਵੇਖਾਂਗੇ ਕਿਹੜੇ ਭਾਅ ਵਿਕੇਂਦੀ ਹੈ ।
(ਬਲਜੀਤ ਪਾਲ ਸਿੰਘ)
Tuesday, October 31, 2023
ਗ਼ਜ਼ਲ
ਘਰ ਅੰਦਰ ਬੈਠੇ ਬੰਦੇ ਨੂੰ ਵੀ ਖਤਰਾ ਹੈ
ਮੰਡੀ ਦਾ ਮਸਲਾ ਧੰਦੇ ਨੂੰ ਵੀ ਖਤਰਾ ਹੈ
ਬਹੁਤੀ ਥਾਈਂ ਲੋਹੇ ਨੇ ਕਬਜ਼ਾ ਹੈ ਕੀਤਾ
ਤਰਖਾਣਾਂ ਦੇ ਹੁਣ ਰੰਦੇ ਨੂੰ ਵੀ ਖਤਰਾ ਹੈ
ਜਦ ਲੋਕਾਂ ਨੇ ਮੂੰਹ ਨਾ ਲਾਇਆ ਤਾਂ ਫਿਰ ਓਦੋਂ
ਠੱਗ ਟੋਲਿਆਂ ਦੇ ਚੰਦੇ ਨੂੰ ਵੀ ਖਤਰਾ ਹੈ
ਹਰ ਵੇਲੇ ਡਰਦਾ ਰਹਿੰਦਾ ਹੈ ਵਿਦਰੋਹ ਕੋਲੋਂ
ਸੱਚੀ ਗੱਲ ਸਿਸਟਮ ਗੰਦੇ ਨੂੰ ਵੀ ਖਤਰਾ ਹੈ
ਫਸ ਜਾਂਦਾ ਹੈ ਇੱਕ ਦਿਨ ਚੋਰ ਉਚੱਕਾ ਬੰਦਾ
ਆਖਰਕਾਰ ਤਾਂ ਕੰਮ ਮੰਦੇ ਨੂੰ ਵੀ ਖਤਰਾ ਹੈ
(ਬਲਜੀਤ ਪਾਲ ਸਿੰਘ)
Saturday, October 28, 2023
ਬੜਾ ਕੁਝ ਲਿਖ ਲਿਆ ਹੈ ਬੜਾ ਕੁਝ ਕਹਿਣ ਦੀ ਆਦਤ
ਅਸੀਂ ਸਾਊ ਜਿਹੇ ਬੰਦੇ ਅਦਬ ਵਿੱਚ ਰਹਿਣ ਦੀ ਆਦਤ
ਜਦੋਂ ਕੋਈ ਕਹਿ ਰਿਹਾ ਹੋਵੇ ਬਹਾਰਾਂ ਮਾਣੀਏ ਆਓ
ਉਹਨੂੰ ਆਖੋ ਕਿ ਸਾਨੂੰ ਪੱਤਝੜਾਂ ਨੂੰ ਸਹਿਣ ਦੀ ਆਦਤ
ਕਈ ਵਾਰੀ ਕਿਸੇ ਸੁਫ਼ਨੇ ਦੀ ਹੋਵੇ ਜੇ ਤਮੰਨਾ ਤਾਂ
ਕਿ ਗੂੜ੍ਹੀ ਨੀਂਦ ਵਿੱਚ ਓਦੋਂ ਹੈ ਖੁਦ ਨੂੰ ਲਹਿਣ ਦੀ ਆਦਤ
ਨਹੀਂ ਹੋਣਾ ਫਿਦਾ ਉਸਤੇ ਜੋ ਖ਼ੁਦ ਨੂੰ ਹੀ ਖ਼ੁਦਾ ਸਮਝੇ
ਅਸਾਨੂੰ ਸਾਦਿਆਂ ਲੋਕਾਂ ਵਿਚਾਲ਼ੇ ਬਹਿਣ ਦੀ ਆਦਤ
ਕਦੇ ਨਾ ਪਰਖਣਾ ਇਹ ਹੌਸਲਾ ਸਾਡਾ ਜਾਂ ਸਾਨੂੰ ਵੀ
ਅਸੀਂ ਝਰਨੇ ਹਾਂ ਸਾਨੂੰ ਪੱਥਰਾਂ ਨਾਲ ਖਹਿਣ ਦੀ ਆਦਤ
(ਬਲਜੀਤ ਪਾਲ ਸਿੰਘ)
Monday, October 16, 2023
ਗ਼ਜ਼ਲ
ਬੁਝ ਗਿਆ ਹਾਂ ਮੈਂ ਕਦੇ ਦੀਪਕ ਰਿਹਾ ਹਾਂ ।
ਮਹਿਫਲਾਂ ਦੀ ਸ਼ਾਨ ਤੇ ਰੌਣਕ ਰਿਹਾ ਹਾਂ ।
ਮੈਂ ਦੰਬੂਖਾਂ ਬੀਜਦਾ ਤਾਂ ਹੋਰ ਹੋਣੀ ਸੀ ਕਹਾਣੀ,
ਪਰ ਮੈਂ ਆਗਿਆਕਾਰੀ ਇੱਕ ਬਾਲਕ ਰਿਹਾ ਹਾਂ ।
ਲਾਲਸਾ ਸੀ ਘੁੰਮ ਕੇ ਦੇਖਾਂ ਇਹ ਦੁਨੀਆ ,
ਮੈਂ ਪ੍ਰੰਤੂ ਇੱਕ ਹਲ-ਵਾਹਕ ਰਿਹਾ ਹਾਂ ।
ਬਾਗ਼ੀਆਨਾ ਆਦਤਾਂ ਦਾ ਕੀ ਸੀ ਬਣਨਾ ,
ਮੰਡੀ ਅੰਦਰ ਮੈਂ ਵੀ ਇੱਕ ਗਾਹਕ ਰਿਹਾ ਹਾਂ ।
ਚੜ੍ਹਦੇ ਸੂਰਜ ਨੂੰ ਸਲਾਮਾਂ ਹੁੰਦੀਆਂ ਨੇ,
ਪੁੱਛਣਾ ਕਿਸਨੇ ਸੀ ਮੈਂ ਠੰਡਕ ਰਿਹਾ ਹਾਂ ।
ਇਸ ਵਿਵਸਥਾ ਨੇ ਕਿਵੇਂ ਫਿਰ ਬਦਲਣਾ ਸੀ ,
ਵਿਗੜੇ ਹੋਏ ਵਾਹਨ ਦਾ ਚਾਲਕ ਰਿਹਾ ਹਾਂ ।
ਚੁਭ ਰਿਹਾ ਹਾਂ ਏਸੇ ਕਰਕੇ ਨਾਜ਼ਮਾ ਨੂੰ ,
ਮੈਂ ਹਮੇਸ਼ਾ ਮਰਜ਼ੀ ਦਾ ਮਾਲਕ ਰਿਹਾ ਹਾਂ ।
(ਬਲਜੀਤ ਪਾਲ ਸਿੰਘ)
Monday, October 9, 2023
ਗ਼ਜ਼ਲ
ਨਹੀਂ ਉਹ ਬੋਲ ਸੁਣਦੇ ਹੁਣ ਜੋ ਸਨ ਮਿਸ਼ਰੀ ਦੀਆਂ ਡਲੀਆਂ
ਉਮਰ ਦੇ ਪਹਿਰ ਸਾਰੇ ਬੀਤ ਚੱਲੇ ਤੇ ਤਿਕਾਲਾਂ ਵੀ ਨੇ ਢਲੀਆਂ
ਚਲੋ ਮੈਂ ਏਸ ਉਮਰੇ ਫਿਰ ਸੁਭਾਅ ਨੂੰ ਬਦਲ ਕੇ ਵੇਖਾਂ
ਉਹਨਾਂ ਤੇ ਘੁੰਮੀਏਂ ਜੋ ਦੂਰ ਦਿੱਸਣ ਖੁਸ਼ਨੁਮਾ ਗਲੀਆਂ
ਮਨੁੱਖ ਨੂੰ ਰੋਗ ਨੇ ਬਹੁਤੇ ਦਵਾਈਆਂ ਬਹੁਤ ਖਾਂਦਾ ਹੈ
ਨਾ ਹੋਏ ਰੋਗ ਹੀ ਰਾਜ਼ੀ ਅਤੇ ਮਰਜਾਂ ਨਹੀਂ ਟਲੀਆਂ
ਕਦੇ ਪਿੱਛੇ ਜਿਹੇ ਰਹਿ ਤੇਜ਼ ਤੁਰਦੇ ਲੋਕ ਦੇਖਾਂ ਤਾਂ
ਮੈਂ ਸੋਚਾਂ ਪੁੰਨ ਕੀਤੇ ਨੇ ਇਹਨਾਂ ਨੂੰ ਮਿਲਦੀਆਂ ਫ਼ਲੀਆਂ
ਅਸੀਂ ਪਹਿਲਾਂ ਜਿਹੇ ਹਾਂ ਫੇਰ ਮਿਲ ਕੇ ਵੇਖ ਲੈਣਾ ਜੀ
ਅਸਾਨੂੰ ਅੱਜ ਵੀ ਭਾਉਂਦੇ ਫ਼ਿਜ਼ਾ ਵਿੱਚ ਫੁੱਲ ਤੇ ਕਲੀਆਂ
ਜਿੰਨਾ ਲਈ ਰੁੱਖ ਲਾਏ ਮੈਂ ਅਤੇ ਗਮਲੇ ਸਜਾਏ ਸੀ
ਪਤਾ ਨਹੀਂ ਕਿੰਝ ਹੋਇਆ ਫਾਸਲਾ ਤੋਰਾਂ ਨਹੀਂ ਰਲੀਆਂ
(ਬਲਜੀਤ ਪਾਲ ਸਿੰਘ)
Tuesday, September 26, 2023
ਗ਼ਜ਼ਲ
ਬਥੇਰਾ ਦੂਰ ਜਾਣਾ ਸੀ ਕਦਮ ਪਰ ਖੜ੍ਹ ਗਏ ਨੇ
ਮੇਰੇ ਸਿਰ ਕਰਨ ਨੂੰ ਉਹ ਕੰਮ ਕਿੰਨੇ ਮੜ੍ਹ ਗਏ ਨੇ
ਮੇਰੀ ਅਗਿਆਨਤਾ ਤੇ ਦੋਸਤਾਂ ਨੇ ਹੱਸਣਾ ਹੈ
ਜਮਾਤਾਂ ਉੱਚੀਆਂ ਬੜੀਆਂ ਉਹ ਸਾਰੇ ਪੜ੍ਹ ਗਏ ਨੇ
ਇਹ ਲੱਗੀ ਹੰਝੂਆਂ ਦੀ ਚਹੁੰ ਕੂਟਾਂ ਅੰਦਰ ਝੜੀ ਹੈ
ਕਿ ਰੀਝਾਂ ਸੱਧਰਾਂ ਤੇ ਚਾਅ ਵੀ ਸਾਰੇ ਹੜ੍ਹ ਗਏ ਨੇ
ਉਹ ਕਰਦੇ ਨੇ ਗਿਲਾ ਕਿ ਫੇਰ ਆਇਆ ਜ਼ਲਜ਼ਲਾ ਹੈ
ਕਮਲੇ ਲੋਕ ਐਵੇਂ ਪਰਬਤਾਂ ਤੇ ਚੜ੍ਹ ਗਏ ਨੇ
ਜਰਾ ਤਾਸੀਰ ਹੁੰਦੀ ਦੋਸਤੀ ਦੀ ਫਿਰ ਠੰਡੀ ਠੰਡੀ
ਉਨ੍ਹਾਂ ਦੀ ਗੱਲ ਕੀ ਕਰੀਏ ਜੋ ਏਨਾ ਕੜ੍ਹ ਗਏ ਨੇ
ਕਰੀਂ ਨਾ ਫ਼ਿਕਰ ਤੇਰੇ ਨਾਲ ਖੜ੍ਹਦੇ ਹਾਂ ਅਸੀਂ ਵੀ
ਆਏ ਸੀ ਮਿਲਣ ਜੋ ਮਾਰ ਕੇ ਇਹ ਫੜ੍ਹ ਗਏ ਨੇ
(ਬਲਜੀਤ ਪਾਲ ਸਿੰਘ)
Saturday, September 2, 2023
ਗ਼ਜ਼ਲ
ਮਾਰੂਥਲ ਹਾਂ ਏਸੇ ਕਰਕੇ ਜਜ਼ਬ ਬੜਾ ਕੁਝ ਕਰ ਲੈਂਦਾ ਹਾਂ
ਝੱਖੜ ਪਤਝੜ ਔੜਾਂ ਧੁੱਪਾਂ ਸਹਿਜੇ ਸਹਿਜੇ ਜਰ ਲੈਂਦਾ ਹਾਂ
ਸਾਰੇ ਮੌਸਮ ਕੁਦਰਤ ਮੈਨੂੰ ਬਖਸ਼ਿਸ਼ ਕੀਤੇ ਸ਼ੁਕਰ ਹੈ ਉਸਦਾ
ਜੇਠ ਹਾੜ ਦੀ ਧੁੱਪ ਹੰਢਾਵਾਂ ਪੋਹ ਮਾਘ ਵਿੱਚ ਠਰ ਲੈਂਦਾ ਹਾਂ
ਲਾਸ਼ ਪੁੱਤ ਦੀ ਕਿਸੇ ਪਿਓ ਦੇ ਮੋਢੇ ਉੱਤੇ ਦੇਖਾਂ ਤਾਂ ਫਿਰ
ਸੱਚ ਕਹਿੰਦਾ ਹਾਂ, ਸਹੁੰ ਲੱਗੇ ਮੈਂ ਓਦੋਂ ਅੱਖਾਂ ਭਰ ਲੈਂਦਾ ਹਾਂ।
ਜੇਕਰ ਘਰ ਵਿੱਚ ਵਸਤਾਂ ਦੇਖਾਂ ਖਿਲਰੀਆਂ ਤਾਂ ਉਹਨਾਂ ਨੂੰ ਵੀ
ਵਰਤ ਸਲੀਕਾ ਆਪੇਂ ਹੀ ਫਿਰ ਥਾਵਾਂ ਉੱਤੇ ਧਰ ਲੈਂਦਾ ਹਾਂ
ਰਾਤ ਬਰਾਤੇ ਤੇ ਦਿਨ ਦੀਵੀਂ ਸੜਕਾਂ ਹੋਈਆਂ ਖ਼ੌਫ਼ਜ਼ਦਾ ਨੇ
ਲੁੱਟਾਂ ਖੋਹਾਂ ਵਾਲੇ ਅਨਸਰ ਗਲੀ ਗਲੀ ਨੇ ਡਰ ਲੈਂਦਾ ਹਾਂ
ਜੋ ਚਾਹਿਆ ਸੀ ਓਸ ਤਰ੍ਹਾਂ ਦਾ ਜੀਵਨ ਲੱਭਦੇ ਲੱਭਦੇ ਆਖਰ
ਪਤਾ ਨਹੀਂ ਮੈਂ ਕਿੰਨੀ ਵਾਰੀ ਅੰਦਰੋਂ ਅੰਦਰੀਂ ਮਰ ਲੈਂਦਾ ਹਾਂ
(ਬਲਜੀਤ ਪਾਲ ਸਿੰਘ)